Экономикалык кылмыштуулукка каршы күрөшүү боюнча мамлекеттик кызматы Бишкек ЖЭБиндеги авариялык абалды иликтеп жатат

Экономикалык кылмыштуулукка каршы күрөшүү боюнча мамлекеттик кызматы Бишкек ЖЭБиндеги авариялык абалды иликтеп жатат. Бул тууралуу аталган мекеменин жетекчиси Замирбек Осмонов билдирди.

"Буга чейин премьер-министр Сапар Исаков Экологиялык жана техникалык коопсуздук боюнча мамлекеттик инспекциясына Бишкек ЖЭБиндеги авария боюнча иликтөөнү тапшырган. Эгер инспекция мыйзам бузуу болгон деп бизге керектүү документтерди өткөрүп беришсе, биз тараптан да кеңири иликтөө жүргүзүлөт. Учурда биздин мекеме тарабынан да ыкчам иликтөө иштери жүрүп жатат", - дейт Замирбек Осмонов.

Буга чейин Улуттук коопсуздук кызматынан да ЖЭБдеги авариялык кырдаал боюнча иликтөө жүрүп жактанын билдиришкен.

Эске салсак, 26-январда Бишкек шаарында Жылуулук электр борборунун модернизацияланбаган бөлүгүндөгү от казандарда маселе жаралып, суунун температурасы 84 градустан 62 градуска чейин төмөндөгөндүгүнө байланыштуу борбордогу үйлөргө да жылуулук берүүнүн температурасы төмөндөгөн.

Бишкек ЖЭБден 120 миң 947 үй жылуулук менен камсыздалат.