Ысык-Көлдө ден соолукка зыян уран өндүргөнү жатышабы? Маммүлктү башкаруу фондунун жообу

"Кендерди пайдалануу комитетинде жана Мамлекеттик мүлктү башкаруу фондунда Ысык-Көлдө уран өндүрүү боюнча долбоор даярдалып жатат", - деп бүгүн, 29-январда өкмөттүн Ысык-Көл облусундагы мурдагы ыйгарым укуктуу өкүлү Эмилбек Каптагаев интернеттеги баракчасына жазды.

Анын айтымында, уран өндүрүү ишканасы Балыкчы шаарынын жанындагы Кызыл-Омпол айылында жайгашмакчы. "Улан" шамалынын катуу ылдамдыгын жана анын көлдү көздөй жүргөнүн эске алганда, мындай ишкананы куруу коркунучтуу экени анык. Радиоактивдүү чаң Балыкчыдан Караколго чейин бардыгынын баштарына түшөт", - дейт Каптагаев.

Мамлекеттик мүлктү башкаруу фондунан SUPER.KG порталына билдиришкендей, менчиктештирилген объекттердин базасында уран өндүрүү боюнча ишкана жок. "Ысык-Көлдө андай ишкана куруу боюнча пландар да жок", - дешти мекемеден.