Башкы прокуратура ЖЭБдеги аварияны текшерип, жыйынтыгына жараша чара көрөт

Бүгүн, 29-январда Башкы прокуратура ЖЭБдеги авария боюнча текшерүү ишин баштады. Бул тууралуу SUPER.KG'ге аталган мекеменин маалымат кызматынан кабарлашты.

"Текшерүү иши башталды. Анын жыйынтыгы чыккандан кийин юридикалык баа берилет", - деп билдиришти мекемеден.

Эскерте кетсек, 26-январда кечки саат 6 чамасында Бишкектеги Жылуулук электр борборунун модернизацияланбаган бөлүгүндөгү от казандарда маселе жаралып, суунун температурасы 84 градустан 62 градуска чейин төмөндөгөн. Буга байланыштуу шаардагы үйлөргө берилген жылытуу төмөндөгөн. Мындан улам 2 күн аралыгында Бишкекте электр энергиясын пайдалануу 8-10 пайызга жогорулаган. Электр жабдыктарына күч келгендиктен Бишкектеги кичи райондордо жайгашкан айрым көп кабаттуу үйлөр жарыксыз калган. Бишкек ЖЭБден 120 миң 947 үй жылуулук менен камсыздалат.

Бишкек шаарынын ЖЭБин модернизациялоо долбоорунун алкагында мурунку жабдуулар алынып, жаңы жабдуулар курулган. Буга жалпы эсепте 386 миллион доллар сарпталгандыгы маалымдалган.