Кыздарды жеңил ойлуулукка, чет өлкөдөгү улгайган байларга турмушка чыгууга чакырган жарнамаларга тыюу салуу сунушталды

Бүгүн, 29-январда Жогорку Кеңештеги социалдык маселелер, билим берүү, илим, маданият жана саламаттыкты сактоо боюнча комитетинде интернет сайттарда, социалдык тармактарда спирттик ичимдиктерин жарнамалоого чектөө киргизүү боюнча сунушталган мыйзам долбоору каралды. Анда депутат Дүйшөн Төрөкулов интернеттеги бардык жарнамаларды көзөмөлгө алууну сунуштады. Эл өкүлү акыркы убакта интернетте чектен чыккан жарнамалар берилип жатканын айтты.

“Азыр жаштар телефондо оюн же баракчаларда отурган кезде дароо жарнамалар көрсөтүлө баштайт. Ал жерде түрдүү жарнамалар берилип жатат. Кыздарды жеңил ойлуулукка чакырган, чет өлкөдөгү бай, улгайган адамдарга турмушка чыгууга чакырган абдан кооптуу жарнамалар тарап жатат. Менимче, мыйзамда ушундай жарнамаларды да жайылтууга тыюу салсак”, - деди Төрөкулов.

Экономика министринин орун басары Элдар Абакиров жарнамаларды көзөмөлдөө жагы Монополияга каршы агенттикке тийиштүү экенин айтып, кийинки комитет жыйынында мыйзамга оңдоп-түзөөлөрдү, кошумчаларды киргизүү менен алып келүүгө убада берди.

Комитет аталган мыйзамга толуктоо киргизүү үчүн өкмөткө мүмкүнчүлүк берүүгө убакыт берип, маселени күн тартибинен алып салды.