Колбасадан 4 адам ууланды. Азыктын курамынан тирүү курт чыкты

Бишкекте колбасадан 4 адам ууланып, алар колдонгон азыктын курамынан 4 тирүү курт чыккан.  Бул тууралуу Саламаттыкты сактоо министрлигинин ооруларды алдын алуу департаментинин басма сөз кызматы билдирди. 4-июнда түшкөн арызга ылайык, аталган департаменттин жана Аламүдүн райондук санитардык-эпидемологиялык көзөмөлдөө борборунун кызматкерлери Пригородное айылында жайгашкан колбаса чыгаруучу ишкананы текшерүүгө алышкан. Жыйынтыгында колбасаны жасоодогу технология жана сактоо нормасы сакталбагандыгы, кызматкерлердин медициналык китепчелери, ветеринардык маалым каттар жана колдонулуп жаткан продукциялардын коркунучсуз экендигин тастыктаган документтер жок экендиги белгилүү болду. Ошондой эле ишканада оңдоо иштери жүрүп жатса да, колбаса чыгаруу токтотулган эмес. Бул фактыларды эске алуу менен тиешелүү нормаларды бузууларды оңдомойунча аталган ишкананы жабуу тууралуу токтом чыгарылып, жетекчисине 2000 сом айып пул салынды.