Депутаттар 5-каналды парламенттик телеканалга айландыруу мыйзамын жокко чыгарууну сунуштады

Бүгүн, 29-январда Жогорку Кеңештин комитет жыйынында депутат Дастан Бекешев 5-каналды парламенттик телеканалга айландыруу мыйзамын жокко чыгарууну сунуштады. Тийиштүү мыйзам долбоору биринчи окууда социалдык маселелер, билим берүү, илим, маданият жана саламаттык сактоо боюнча комитетинде каралды.

"5-каналды парламентке алуу үчүн 2011-жылда V-чакырыштагы депутаттар тарабынан парламенттик телеканал керек деп атайын мыйзам чыгарылган. Кийин бул багытта жумушчу топ иштеп бул мыйзам иштебей турганын айтканбыз. Анткени 5 -канал дагы бир ОСООго кирет. Бул мыйзамды жоюш керек деп 2012-жылы демилге кылганбыз. Азыр абал өзгөрдү. Эми парламентте "пирамида" каналы бар. "Пирамида" ачык баарын көрсөтөт. 5-канал юридикалык статусу бар, бирок парламеттик болгон жок. Азыр 5-каналдын абалы начар. Кыргыз телекомдон карызы бар. Азыр пирамида парламенттик каналы бар. Ошондуктан 5 каналдан парламенттик деген статусту алып салсак", - деди Бекешев.

Мамлекеттик мүлктү башкаруу фондунун төрагасынын орун басары Бекболот Алиев учурда аталган каналдын ири карызы бар экенин айтты.

"5-каналдын укуктук формасы жабык акционердик коом. Анда 2009-жылдан баштап бир команда иштеген. 2010-жылга карата каналдын карызы 57,6 миллион доллар болгон. Бүгүнкү күндөгү карызы 85.6 миллион долларды түзөт", - деди Алиев.

Комитет 5-каналдан баш тартуу боюнча мыйзамды биринчи окууда колдоду.