"Улуттук энергетикалык холдингдин" өкүлү Бишкек жылуулук менен качан толук камсыз боло турганын так айткан жок

"Улуттук энергетикалык холдинг" компаниясынын жетекчисинин биринчи орун басары Нурлан Садыков Бишкек шаары качан жылуулук менен толук камсыз боло турганын айткан жок.

Ал бүгүн, 29-январда брифинг учурунда журналисттердин суроолоруна жооп берип жатып, жылуулуктун толугу менен берилиши боюнча так мөөнөтүн айта алган жок. Садыков шаар тургундарын жылуулук менен камсыз кылуу боюнча бардык күчтөрүн жумшай турганын билдирди.

Эскерте кетсек, 26-январда кечки саат 6 чамасында Бишкектеги Жылуулук электр борборунун модернизацияланбаган бөлүгүндөгү от казандарда маселе жаралып, суунун температурасы 84 градустан 62 градуска чейин төмөндөгөн. Буга байланыштуу шаардагы үйлөргө берилген жылытуу төмөндөгөн. Мындан улам 2 күн аралыгында Бишкекте электр энергиясын пайдалануу 8-10 пайызга жогорулаган. Электр жабдыктарына күч келгендиктен Бишкектеги кичи райондордо жайгашкан айрым көп кабаттуу үйлөр жарыксыз калган. Бишкек ЖЭБден 120 миң 947 үй жылуулук менен камсыздалат.

Айта кетсек, Бишкек шаарынын ЖЭБин модернизациялоо долбоорунун алкагында мурунку жабдуулар алынып, жаңы жабдуулар курулган. Буга жалпы эсепте 386 миллион доллар сарпталгандыгы маалымдалган.