Чүйдө жеке ишкананын 7 миллион сомго жакын акчага бааланган жабдууларын уурдап кетүүгө шектелип 3 жигит кармалды

Чүйдө жеке ишкананын 7 миллион сомго жакын акчага бааланган жабдууларын уурдап кетүүгө шектелип 3 жигит кармалды. Бул тууралуу SUPER.KG'ге 29-январда Чүй ОИИББинин маалымат кызматынан кабарлашты.

Маалым болгондой, 17-январь күнү Кемин районунун ички иштер бөлүмүнө Орловка шаарында жайгашкан жеке ишканалардын биринин башкы директору арыз менен кайрылып, кымбат баадагы жабдууларын бейтааныш адамдар уурдап кеткенин билдирген.

Окуя болгон жерге Кемин РИИБинин ыкчам-тергөө тобу чыгышып, ишкананын кеңсесинде турган кымбат баалуу жабдуулары уурдалганын аныкташкан. Уурдалган жабдуулар ширетүү аппараттары, генератор жана башка ушул сыяктуу жабдуулар болгон. Ишканага келтирилген зыяндын өлчөмү 6 990 000 сомду түзгөн. Топтолгон материалдардын негизинде Кемин РИИБинин тергөө кызматы тарабынан кылмыш иши козголуп, далил буюмдарга экспертиза дайындалган.

Кылмышка шектүү жарандардын аты-жөнү аныкталып, шектүү катары 25 жаштагы А.Т. аттуу жергиликтүү жашоочу кармалып, анын көрсөтмөсү менен ушул кылмышка тиешеси бар башка жарандар кармалышкан. Алар мурда “уурулук” боюнча бир нече жолу сот жообуна тартылган 27 жаштагы К.Э. жана 24 жаштагы С.Т. аттуу жарандар болушкан.

Тергөө иштеринин жүрүшүндө уурдалган буюмдардын көпчүлүгү Орловка шаарына жакын жерге жашырылган жеринен табылган. Ал эми калган бөлүгү Бишкек шаарындагы базарлардын бирине сатылып кеткен жеринен кайтарып алынган. Кармалган жарандар Кемин РИИБинин убактылуу кармоочу жайына камакка алынган. Учурда тергөө иштери жүргүзүлүүдө.