"Ата Мекен": "Текебаев өзү отурган камерага видеобайкоо орнотууга каршы. Ал онлайндагы видеобайкоо болгондуктан аны кимдер көрүп жатканы белгисиз"

Жогорку Кеңештин мурдагы депутаты Өмүрбек Текебаев отурган камерага өзүнүн макулдугу менен видеобайкоо орнотулганын бүгүн, 29-январда Жазаларды аткаруу мамлекеттик кызматынан кабарлашкан. Бул анын коопсуздугу үчүн жасалган аракет экендиги айтылган.

Бирок "Ата Мекен" партиясынын юристи Таалайгүл Токтакунова Өмүрбек Текебаев камерасына видеобайкоо орнотулганына каршы экендигин SUPER.KG'ге айтып берди.

"Жазаларды аткаруу мамлекеттик кызматы туура эмес маалымат таратып жатат. Анткени Өмүрбек Текебаев видеобайкоону камеранын ичине коюуга каршы болуп, сыртына коюуга макулдук берген. Башкача айтканда, камеранын кире беришине. Мыйзам боюнча анын макулдугу жок видеобайкоо орнотууга эч кимдин укугу жок. Ал киши террорист же уюшкан кылмыштуу топтун мүчөсү эмес да, макулдугу жок эле видеобайкоо орнотууга.

Биздин билишибизче ал онлайн видеобайкоо экен. Текебаевди онлайн көрүүгө айрым гана адамдардын мүмкүнчүлүгү бар деп жатышат. Кимдер карап жатканын кайдан билебиз? Мүмкүн, уюшкан кылмыштуу топтор карап жаткандыр. Бул жерде тескерисинче, ал кишинин коопсуздугуна коркунуч жаралып жатат. Бул моралдык жактан чоң сокку. Анткени же далыңды тырмай албайсың же жакшы жатып уктай албайсың. Кечээ жактоочусу Искен Афиджанов кирип чыкты. Ага да каршы экендигин айтыптыр", - деди Токтакунова.