Аида Салянованын жактоочусу ооруп калып, соттук отурум жылдырылды

Бишкек шаардык соту депутат Аида Салянованын ишин кароону башка күнгө жылдырды. Соттук жамааттын мындай чечим кабыл алуусуна Салянованын жактоочусу Чынара Жакупбекованын ооруп калгандыгы себеп болду. Сотто Жакупбекова ооруп жатканын айтып, бир жума ооруканага жатып дарылануусу керектигин аныктаган маалымкатты көрсөттү. Соттук жамаат ишти кароону 31-январь күнү уланарын, Саляновага мамлекеттик жактоочу дайындаларын чечти.

Эскерте кетсек, Салянова "Юстиция министри болуп турганда кылмыш жасаганы үчүн издөөдө жүргөн Алексей Елисеевдин адвокаттык лицензиясын узарткан" деп айыпталып, 2017-жылдын 10-октябрында Ленин райондук соту тарабынан күчөтүлгөн тартипте 5 жылга эркинен ажыратылган. Сот өкүмү анын 2 жаштагы наристеси 14 жашка толгондо күчүнө кирет. Бул чечимге нааразы болгон Салянова шаардык сотко даттанган.