Депутат төрөт үйүндө электр жарыгы өчүп, төрөлгөн эгиздердин бири чарчап калганын айтты

"Ата Мекен" фракциясынан депутат Айсулуу Мамашова төрөт үйүндө электр жарыгы өчүп, төрөлгөн эгиздердин бири чарчап калганын айтты. Бул тууралуу ал бүгүн, 30-январда Бишкек жылуулук электр борборунда Жогорку Кеңештин отун-энергетика, кен байлыктарын пайдалануу боюнча комитетинин көчмө жыйынында билдирди.

"№4-төрөт үйүндө эгиздер жарык дүйнөгө келип, электр энергиясы жок болгондуктан аппараттар иштебей эгиздердин бири чарчап калган окуя болду", - деди депутат.

"Улуттук энергетикалык холдингдин" төрагасы Айбек Калиев бул окуя боюнча маалыматы жоктугун айтты. Ал эми "Түндүк электр" ААКсынын башкы директору Искендер Кадыркулов ооруканалардын баары электр энергиясы менен үзгүлтүксүз камсыздалып жатканын билдирди. “Бишкектеги ооруканалардын баары электр энергия менен камсыздалган. Ал жерде электр жарыгы өчкөн болсо, дароо генераторлордун жардамында электр жарыгы берилет. Сиз айтып жаткан маалыматтарды уккан жокпуз”, - деп Кадыркулов депутаттын суроосуна жооп берди.