Сапар Исаков "Электр станциялары" ишканасынын жетекчисинин биринчи орун басарын, Бишкек ЖЭБдин директорун жумуштан алууну тапшырды

Премьер-министр Сапар Исаков бүгүн, 30-январда "Улуттук энергетикалык холдинг компаниясы" ачык акционердик коомуна "Электр станциялары" ачык акционердик коомунун башкы директорунун биринчи орун басары Бердибек Боркоевдин жана Бишкек шаарынын ЖЭБинин директору Нурлан Өмүркул уулунун ээлеген кызматтарына дал келүүсү боюнча маселени карап чыгуусун сунуштоо чечимин кабыл алды.

Өкмөт башчы биринчи кезектеги чечим катары "Улуттук энергетикалык холдинг компаниясы" ААКсынын жетекчилигине көрсөтүлгөн жетекчилердин ээлеген кызматынан бошотуу маселесин бекитилген тартипте карап чыгууну тапшырды.

Мындан тышкары, Бишкек шаарын жылуулук менен камсыздоону калыбына келтирүү боюнча ыкчам штабдын демилгеси боюнча, 26-январдан тарта Бишкек шаарында жылуулук энергиясынын берилишинин үзгүлтүккө учурашынын себептерин аныктоо боюнча комиссияны түзүү чечими кабыл алынды. Анын курамына Жогорку Кеңештин депутаттарын, тийиштүү мамлекеттик жана укук коргоо органдарынын өкүлдөрүн, энергетика тармагындагы адистерди жана көз карандысыз эксперттерди киргизүү сунушталды.

Премьер-министр белгилегендей, аталган кадам биринчи кезектеги чечим болуп саналат. Өз милдеттерине шалаакы мамиле кылуусунун натыйжасында Бишкек шаардык ЖЭБ ишиндеги бузулуулар орун алгандыгына күнөөлүү жактарды жазалоо боюнча кийинки аракеттер ведомство аралык комиссиянын ишинин жыйынтыгы боюнча кабыл алынат.