ӨКМ: "Февраль айында Бишкекте катуу суук болбойт"

Бишкекте февраль айында катуу суук болбойт. Мындай билдирүүнү бүгүн, 31-январда өзгөчө кырдаалдар министри Кубатбек Боронов Жогорку Кеңештин жыйынында айтты.

"Бишкектеги катуу суук өтүп кетти. Абанын температурасы -10го чейин түшүшү мүмкүн, бирок жакынкы күндөрдө күн жылып баштайт", - дейт министр.

Ал эми Кыргызгидромет февраль айында суук жылдагыдай эле боло тургандыгын билдирет. Алдыдагы айда аба ырайынын кескин сууктап кетиши тууралуу божомолдор жок. Чүй жана Талас облустарында абанын температурасы түнкүсүн +1ден -10 градуска чейин болот. Нарын, Ысык-Көл облустарында түнкүсүн суук -6дан -11 градуска чейин болсо, өлкөнүн түштүк аймагында түнкүсүн аба ырайы +3төн -8 градус боло тургандыгы күтүлөт. Ал эми күндүзү өлкө аймагында февраль айында абанын температурасы +5тен +15 градуска чейин жогорулашы мүмкүн.