"ЭЛДИК КАБАРга" жооп: "Дүмүрчөгүн жоготуп алдым деген жаран социалдык фондго кайрылган эмес, эгер кайрылса төлөгөнү же төлөбөгөнү боюнча маалыматты беребиз"

Социалдык фондго төлөнгөн төлөмдөрдүн дүмүрчөктөрүн жоготуп алган Базар-Коргон районунун тургуну бизге кайрылган эмес, эгер кайрылса төлөгөнү же төлөбөгөнү боюнча маалыматты беребиз. Бул тууралуу SUPER.KG порталына Базар-Коргон райондук социалдык фондунун жетекчисинин орун басары Алмазбек Базаркулов билдирди.

"Абдыкалык Маматов аттуу тургун кайрылганы тууралуу менде маалымат жок. Ал социалдык фонддун жетекчилерине кирип сүйлөшкөм дептир, андай болгон эмес. Ал киши эгер чындап эле дүмүрчөктөрүн жоготуп алган болсо, анда биздеги маалыматтарды карап чыгып ал кишиден талап кылып жаткан мекемеге тастыктоочу документтерди бере алабыз", - деди Алмазбек Базаркулов.

Айта кетсек, буга чейин SUPER.KG порталынын "Элдик кабар" рубрикасына Жалал-Абад облусунун Базар-Коргон районуна караштуу 1-Май айылынын Абдыкалык Маматов аттуу тургуну кайрылган. Ал социалдык фондго төлөнгөн төлөмдөрдүн дүмүрчөктөрүн жоготуп алганын, аны социалдык фонддон текшерип берүүсүн өтүнсө, алар карап берүүдөн баш тартышканын билдирген.