Бүгүн Бишкек шаардык соту жактоочусу ооруп жаткан Салянованын ишин мамлекеттик адвокаттын катышуусунда карайт

Бүгүн, 1-февралда Бишкек шаардык сотунда Жогорку Кеңештин депутаты Аида Салянованын иши каралат. Кечээ, 31-январда Салянованын жактоочусу Чынара Жакупбекованын ооруп калганына байланыштуу жаңы жактоочу дайындалган. Ал соттон иш менен таанышып чыгууга убакыт берүүнү өтүнгөндүктөн сот ага бир күн даярданууга убакыт берген болчу. Отурум бүгүн, 1-февралда саат 10:00дө улантылат.

Жаңы дайындалган жактоочу Саня Ахмаметова журналисттерге бул убакыт иш менен таанышып чыгууга өтө аз экенин айткан.

Эскерте кетсек, Салянова "Юстиция министри болуп турганда кылмыш жасаганы үчүн издөөдө жүргөн Алексей Елисеевдин адвокаттык лицензиясын узарткан" деп айыпталып, 2017-жылдын 10-октябрында Ленин райондук соту тарабынан күчөтүлгөн тартипте 5 жылга эркинен ажыратылган. Сот өкүмү анын 2 жаштагы наристеси 14 жашка толгондо күчүнө кирет. Бул чечимге нааразы болгон Салянова шаардык сотко даттанган.