Өзбекстандын коопсуздук кызматын 23 жыл башкарып, кызматтан бошотулган Рустам Иноятов президент Мирзийоевге кеңешчи болду

Өзбекстандын коопсуздук кызматын 23 жыл башкарып, кызматтан бошотулган Рустам Иноятов президент Шавкат Мирзийоевге кеңешчи болду. 73 жаштагы Иноятов мындан ары өлкө башчынын саясий-укуктук маселелер боюнча мамлекеттик кеңешчилигине дайындалды. Бул тууралуу өзбек президентинин басма сөз кызматы билдирди.

Рустам Иноятов узак жылдар жетектеген коопсуздук кызматынан кеткенин президент Шавкат Мирзийоев 31-январда жарыя кылган.

Маалыматка ылайык, Рустам Иноятовдун ордуна учурдагы Өзбекстандын башкы прокурору Ихтиер Абдуллаев келди. Бул жөнүндө президент Шавкат Мирзийоев, прокуратура жана Улуттук коопсуздук кызматынын жетекчилери катышкан жыйында белгилүү болгон.

Иноятов Улуттук коопсуздук кызматынын башчылыгына 1995-жылы келген. Ал эми Абдуллаев башкы прокурор болуп 2015-жылдын апрель айында дайындалган.