Азия өнүктүрүү банкы Кыргызстанга 20 миллион АКШ долларын бөлүп берет

Азия өнүктүрүү банкы Кыргызстандын бюджетин колдоо иретинде Кыргызстанга 20 миллион АКШ долларын бөлүп берет. Бул тууралуу экономика министри Темир Сариевдин орун басары Олег Панкратов билдирди. Анын айтымында, 26-ноябрда аталган банктын Директорлор кеңешинин жыйыны болуп, анда ушул маселе каралмакчы. Кошумчалай кетсек, жакында эле Кыргызстандын бюджетин колдоо иретинде Орусия өкмөтү Кыргызстанга кайтарылгыс грант катары 25 миллион АКШ долларын бөлүп берүү чечимин кабыл алган.