Айрым депутаттар электр энергиясына болгон тарифти көтөрүш керек деген пикирде

Жогорку Кеңештин айрым депутаттары электр энергиясына болгон тарифти жогорулатуу керек деген пикирде. Ал буга электр энергиясынын өздүк баасы жогору болуп, арзан баада сатылып жатканын негиз кылууда. Айтмамат Назаров тарифти жогорулатуу жолу менен гана өлкөдөгү энергетика тармагын жакшыртууга болорун айтты.

"Тарифтер көтөрүлүш керек. Бирок жанагы 700 киловатт деген калышы шарт. Ошол 700 киловаттын баасы өзгөрбөйт. Калган коммерциялык жагы, менин билишимче, 2 сом 24 тыйын болушу керек. Ошол бааны үч сомго чейин көтөрүү зарыл.

Биздин баа Орто Азиядагы эң арзан баа. Жарандар 700 киловаттка көнүп калды. Ошонун эсебин кармашат. Ошондуктан бул баа элге зыян алып келбейт деген ойдомун. Коммерциялык структуралар, бизнеске болгон баалар жогорулашы керек. Антпесек электр тармагын талкалап алабыз. Бүгүн электр энергиясы жылына 7-8 миллиард сомдун тегерегинде зыянга учурап жатат", - деди Назаров.

Ал эми депутат Кожобек Рыспаев баа саясатын өкмөт көзөмөл кыларын айтты.

"Тариф саясатын биз өкмөткө бергенбиз. 5-чакырылышта биздин өкмөт суранганда тарифтерди аныктоо укугун өткөрүп бергенбиз. Азыр өкмөткө караштуу Отун-энергетикалык комплексин жөнгө салуу боюнча мамлекеттик агенттик алектенет. Анткени ушул жол менен энергетика тармагы насыя алууга шарт түзүлөт. Бирок учурда энергетика тармагы абдан эскирди, жасалуучу, оңдолуучу жабдыктар көп. Ал эми аны жолго коюу үчүн тариф саясатынан башка жол жок", - деди Рыспаев.