Түштүк Африка өлкөсүндө акыркы 100 жылда болбогон кургакчылык башталды

Түштүк Африка Республикасында акыркы 100 жылда болбогон катуу кургакчылык башталды. Өлкөнүн Кейптаун шаары жакын арада ичүүчү суусу жок калуу коркунучуна кептелди. Бул тууралуу чет элдик маалымат булактары жазышты.

Буга чейин бир катар окумуштуулар аймакта мындай абал болорунан коңгуроо кагышкан. Бирок аны алдын алууга жумшалган бир канча аракеттер натыйжа берген эмес. Кейптаун суу сактагычындагы суунун көлөмү белгиленген чектен төмөндөп баратканы байкалган. Абал ушул бойдон уланса, апрелдин орто ченинде аталган шаардын тургундары суусуз калат.

Жергиликтүү бийлик шаар тургундарын сууну болушунча үнөмдөп пайдаланууга чакырууда. Учурда күнүнө 50 литрден ашык суу пайдаланбоо үчүн чектөө киргизилүүдө. Шаар бийлиги калк сууну үнөмдөбөсө атуулдарды мажбурлоо үчүн өтө жогорку тарифти киргизүү жагын карап жатат.

Тынчы бузулган жарандар суу токтой электе суу запасын камдоого аракет кылууда. Эксперттердин айтымында, Кейптаун - климаттык глобалдык өзгөрүүгө туш болгон биринчи чоң шаар.