Президенттик аппарат: "Сооронбай Жээнбеков журналистке каршы берген 5 миллион сомдук доо арызды чакыртып алган жок"

Президент Сооронбай Жээнбеков 24.кг сайтына салынган 5 миллион сом айып пулдан баш тартты. Ал эми сотко берүүгө түрткү болгон макаланын автору, журналист Кабай Карабековдон 5 миллион сом өндүрүү боюнча арызды чакыртып алган эмес. Бул тууралуу бүгүн, 5-февралда SUPER.KG порталына президенттик аппараттын маалыматтык-саясат бөлүмүнүн жетекчиси Толгонай Стамалиева билдирди.

Эске салсак, бүгүн аталган сайтка президент 24.кг сайтына салынган айып пулдан баш тартканы боюнча маалымат жарыяланган.

11-сентябрда аталган агенттикке Кабай Карабековдун экс-президент Алмазбек Атамбаевдин Сочиге барганы боюнча "Сочиге сапар. Кремлге мураскердин артыкчылыгын кайра түшүндүрүп жатышат" деген макаласы жарыяланган. Анда Москва тарапты "ага-ини Жээнбековдордун радикалдуу араб уюмдары менен тыгыз байланышы бар болушу мүмкүн" деген Кыргыз жана Орус атайын кызматтары берген маалымат тынчын алып жатканы тууралуу жазылган. Мындан улам ошол кездеги президенттикке талапкер Жээнбековдун шайлоо штабы сотко кайрылган.

Ишти Бишкектеги Свердлов райондук соту карап 5-октябрда Кабай Карабековдон жана 24.кг агенттигинен 5 миллион сомдон айып пул салуу чечимин чыгарган. Бул чечимди Бишкек шаардык сот күчүндө калтырган.