Бүткүл дүйнөлүк саламаттыкты сактоо уюму спирттик ичимдиктер пайда кылган рактын 7 түрүн атады

Бүткүл дүйнөлүк саламаттыкты сактоо уюму Ракка каршы күрөшүүнүн дүйнөлүк күнүнө карата алкоголдук ичимдикти ичкендерге жана онкологиялык оорусу барларга эскертүү жарыялады. Бул жөнүндө чет элдик басылмалар жазып чыгышты.

Маалыматка ылайык, дүйнө элдери онкологиялык ооруларга каршы күрөшүү күнүн 4-февралда белгилейт.

Окумуштуулардын изилдөөсү көрсөткөндөй, спирттик ичимдиктер аз дегенде рактын 7 түрүн пайда кылат. Алкоголдук ичимдиктерден улам ичегиде (жоон ичеги жана түз ичеги), эмчекте, кызыл өңгөчтө , кекиртекте, боордо, ооз көңдөйүндө рак илдети пайда болушу мүмкүн.

“Алкоголдук ичимдиктерди ичүүдө организмдеги клеткалар жабыр тартып, оорунун коркунучу күчөйт. Спирт ичимдигин жана тамекини бир убакта организмге кабылдоо адамдагы онкологиялык оорулардын пайда болушун күчөтөт. Күнүнө 4 стакан шарап ичкен аялдарда эмчек рагынын пайда болуу коркунучу 50 пайызга өсөт, күнүнө 8 стакан иче турган болсо бул көрсөткүч 130 пайызга жогорулайт”, - деп айтылат окумуштуулардын иликтөөсүнө таянып жазылган маалыматта.

Ошондой эле кабарда көпчүлүк адамдардын спирттик ичимдиктер ракты пайда кыларынан толук кабары жок экендиги жазылган.