Путин Кыргыз өлкөсүнүн Орусияга 240 миллион доллар карызын кечүү боюнча мыйзамга кол койду

Владимир Путин Кыргыз Республикасынын Орусияга буга чейинки насыялар боюнча карызын жөнгө салуу жөнүндө мыйзамга кол койду. Бул тууралуу укуктук маалымат расмий порталына таянып орусиялык басылмалар жазып чыгышты.

Маалым болгондой, кеп 240 миллион доллар карыз тууралуу болууда. "Жалпысынан кыргыз тарапка 488,9 миллион доллар насыя берилген. Кыргыз өлкөсү бул сумманын 55,1 миллион долларын гана кайтарган", - деп жазышат басылмалар.

Буга чейин Орусиянын Мамлекеттик Думасы Кыргыз өлкөсүнүн 240 миллион доллар карызын кечүү боюнча өкмөт аралык макулдашуунун протоколун ратификациялаган.

Айта кетсек, Орусия тараптын дагы 240 миллион карыздан кечүү тууралуу протоколго экс-президент Алмазбек Атамбаев менен Орусиянын президенти Владимир Путин 2017-жылдын 20-июнунда Москвадагы жолугушуусунда кол коюшкан.

Бул макулдашуунун протоколун Жогорку Кеңеш былтыр 2-ноябрда ратификациялап, мыйзамга президент Сооронбай Жээнбеков өткөн жылы 9-декабрда кол койгон.