Өзбекстандын аймагына кирип кеткени үчүн бутуна ок атылган делген Кыргыз жараны чек арадан өтпөгөнүн билдирди

Мал кайтарып жүрүп, Өзбекстандын аймагына өтүп кеткендиги үчүн чек арачылар тарабынан бутуна ок атылган делген Кыргыз жараны бул маалыматты жокко чыгарып, чек арадан өтпөгөндүгүн, тескерисинче чек арачылар Кыргыз тарапка 800 метрдей кирип келип, ок чыгарышканын SUPER.KG порталына билдирди.

"Мен чек арадан өткөн эмесмин, өзүбүзгө тийиштүү үлүш жерде жүргөм. Тескерисинче, өзбек чек арачылары биздин аймакка болжол менен 800 метрдей кирип келип, ок чыгарышты. Мен эч кандай каршылык көрсөткөн эмесмин", - деди ал.

Ошондой эле Өзбекстандан Кыргыз өлкөсүнө кайтарылып берилип, учурда шаардагы ооруканалардын биринде дарыланып жатканын кошумчалады. Ал эми мамлекеттик чек ара кызматынын басма сөз кызматы учурда бул боюнча иликтөө иштери жүрүп жатканын билдирди.

Эске салсак, 27-январь күнү мал кайтарып жүрүп, Өзбекстандын аймагына өтүп кеткендиги үчүн чек арачылар тарабынан Кыргыз жаранынын бутуна ок атылгандыгы тууралуу маалымат тараган.