Аида Салянованын иши каралып жаткан сот имаратына 30дай милиция кызматкери кирип келди

Бүгүн, 6-февралда Бишкек шаардык сотунда депутат Аида Салянованын иши каралып, анын коомдук жактоочусу Рабига Сыдыкованын жарыш сөзү жүрүүдө. Андан кийин сөз Салянованын өзүнө берилет.

Бирок учурда сот имаратынын алдында милиция кызматкерлери турат. Түшкү тыныгууга чейин имараттын ичинде 10го жетпеген милиция кызматкери болгон болсо, учурда алардын саны 30га чукулдады. Алар сот отуруму ачык өтүү керек болгонуна карабай залды сыртынан кайтарууга алышууда.

Кечээ, 5-февралдагы отурумда жактоочу Чынара Жакупбекова шаардык соттон райондук соттун чечимин жокко чыгарып, Салянованы актоо өтүнүчүн келтирген. Ал эми мамлекеттик айыптоочулар райондук соттун чечимин жокко чыгарып, депутатты 8 жылга эркинен ажыратуу менен мүлкүн мамлекеттин эсебине алууну суранышкан. Мамлекеттик айыптоочулардын айтымында, райондук соттун чечими жумшак чечим болуп калган. Прокурор сот өкүмү анын 2 жаштагы наристеси 14 жашка толгонун күтпөстөн дароо күчүнө кириши керектигин белгилеген.

Эскерте кетсек, Салянова "Юстиция министри болуп турганда кылмыш жасаганы үчүн издөөдө жүргөн Алексей Елисеевдин адвокаттык лицензиясын узарткан" деп айыпталып, 2017-жылдын 10-октябрында Ленин райондук соту тарабынан күчөтүлгөн тартипте 5 жылга эркинен ажыратылган. Сот өкүмү анын 2 жаштагы наристеси 14 жашка толгондо күчүнө кирет. Бул чечимге нааразы болгон Салянова шаардык сотко даттанган. Андан кийин Башкы прокуратура да арыз берген.