Ошто энеси тарабынан депкир менен эсинен тангыча сабалган наристе канга муктаж

Ошто энеси тарабынан депкир менен эсинен тангыча сабалган балага плазма (кандын сары суусу) куюлат. Мындай маалыматты кечээ, 6-февралда Ош шаардык социалдык өнүктүрүү башкармалыгынын үй-бүлө жана балдарды коргоо бөлүмүнүн башчысы Гүлзина Раева билдирди.

Анын билдирүүсүнө ылайык, кечээ аталган башкармалыктын кызматкерлери наристеге барып, абалынан кабар алышкан.

"Бала жандандыруу бөлүмүндө жаткандыктан көп кишини киргизбей жатат. Биздин жетекчибиз эле кирип көрүп чыкты. Анын айтымында, келиндин бала тепкичтен кулап кетти деген көрсөтмөсү такыр дал келбейт. Анткени баланын денесинин баары көк ала болуп кетиптир. Ийне сайган учурда бир аз сезгендей белгилерди бергени менен, эсине келе элек", - дейт Раева.

Ал билдиргендей, наристеге кечээ кечинде кан куюлган. Ага плазма керек экендиги айтылган. Социалдык башкармалыктын 15 кызматкерлери кан берүү үчүн ооруканага барышкан.

"Ушул аракеттерден кийин баланын абалында өзгөрүүлөр болсо операция жасала турганын дарыгерлер айтып жатышат", - деди ал.

Эске салсак, Кара-Кулжа районунун 23 жаштагы тургуну Ошко эжесинин үйүнө келип, өзүнүн 2 жаш 8 айлык баласын депкир менен эсинен тангыча сабагандыгы маалымдалган. Кийинчерээк өздүк булактар анын сойкулук менен алектениши мүмкүн экендигин билдиришкен. Ал эми дарыгерлер эсин жоготуп ооруканага түшкөн наристенин абалы оор экенин, анын денесинде ур-токмоктон калган эски тактар да бар болгонун айтышкан. Бул факты боюнча Ош шаардык ички иштер башкармалыгы тарабынан кылмыш иши козголуп, тергөөнүн жүрүшүндө аял баласын шымына сийип койгондугу үчүн сабаганын айткан. Кийин келиндин туугандары табылбай жатканын, анын жана баласынын эч кандай документтери жок экенин Ош шаардык социалдык өнүктүрүү башкармалыгынан маалымдашкан.