Орусияда Түндүк Кореядан келип эмгектенген мигранттарды депортациялоо башталды

Орусияда Түндүк Кореядан келип эмгектенген мигранттарды депортациялоо башталды. Бул Бириккен улуттар уюмунун Коопсуздук кеңеши кабыл алган резолюцияга ылайык жүрүүдө. Бул тууралуу Түндүк Кореядагы Орус элчиси Александр Мацегордун маалыматына таянып, чет элдик маалымат булактары жазууда.

"Түндүк Кореянын жумушчуларына тыюу салынышы, Орусиянын экономикасына сокку болот. Бирок биз БУУнун Коопсуздук кеңешинин чечимин аткарышыбыз керек. Орусиянын көптөгөн облус башчылары Түндүк Кореядан келген мигранттарды өлкөдөн чыгаруу иштерин баштады", - деди Мацегор.

Маалыматтарга караганда, Орусия жылына Түндүк Кореянын 12-15 миң жарандарына виза берет. Анын 90 пайызы кыска мөөнөттүү жумуш визасын түзөт. Ал эми Александр Мацегордун айтымында, Орусиянын аймактарындагы айыл чарба, өндүрүш, курулуш тармактарында 35 миңден ашык түндүк кореялыктар эмгектенет. Жумушчулар тапкан каражатынын 40-50 пайызын өздөрү алып, калган бөлүгүн мамлекетке беришет.

Белгилей кетсек, 2017-жылдын сентябрь айында БУУнун Коопсуздук кеңеши Түндүк Кореяга карата санкцияларды киргизүү боюнча бир добуштан чечим кабыл алган. Ага ылайык, аталган өлкө экспорттук, импорттук мүмкүнчүлүктөрүнөн ажырайт. Резолюциянын дагы бир бөлүмүндө, Түндүк Кореянын жарандарына жумуш берүүгө тыюу салуу каралган. Октябрь айында Орус президенти Владимир Путин резолюцияны ишке ашыруу боюнча мыйзамга кол койгон.