Түркмөнстанда окуучу кыздардын кыздык белгилерин текшеришти

Түркмөнстандын Дашогуз шаарынын мектептеринде, кээ бир райондордун борборлорунда окуучулардын телефондорунда порнографиялык мүнөздөгү видео жана сүрөттөр бар же жок экенин текшерүү жүрдү. Мындан сырткары жогорку класстардын окуучу кыздарынын кыздык белгилерин гинекологдор текшерүүдө. Бул тууралуу жергиликтүү басылмалар жазышты.

Маалым болгондой, өткөн жумада Түркмөнстандын түндүк облусунда билим берүү тармагынын кызматкерлери, Улуттук коопсуздук кызматынын өкүлдөрү, милиция кызматкерлери жана дарыгерлер уруксаты жок эле сабак учурунда класстарга кирип окуучулардын уюлдук телефондорун чогултуп кетишкен. Алар ичиндеги файлдарды текшерүү максатында чогултулганын билдиришкен.

“Эскертүүсү жок эле кишилер кирип келип баарыбыздын уюлдук телефонубузду чогултуп алды, алар эмне үчүн телефондорду текшерип жатканын айткан жок. Кийинчерээк порнографиялык материалдарды издегени белгилүү болду. Андай материалдарды дээрлик бардык окуучулардан тапты”, - дейт Дашогуз облусунун Гурбансолтан районундагы орто мектептин окуучусу.

Анын айтымында, порнографиялык материалдарды тапкандан кийин уюлдук телефондорун алышып, ата-энелеринин катышуусунда сүйлөшүүлөр жүргүзүлдү.

Жергиликтүү тургундардын айтуусунда, жогорку класстардын окуучу кыздарын мектептин медициналык бөлүмүндө катарга тизип алып текшеришти. "Кайсы кыздын кыздык белгиси жок болсо, апаларын чакырып элдин көзүнчө алардын тарбиясына көңүл бурууга чакырышты”, - деп журналисттерге белгисиз бойдон калууну каалаган тургун айтып берген.

Райондук полициянын кызматкери билдиргендей, акыркы учурда сойкулук менен алектенгендердин саны мектеп курагындагы кыздардын арасында көбөйгөнү текшерүүгө түрткү берген. Жакында эле Түркмөнстанда терс мүнөздөгү жана зордук-зомбулуктарды ТВ-программа жана кинолордон кетирбөө тууралуу мыйзам кабыл алынган.