Бишкектин тургундары ЖЭБдеги авариядан улам жылуулук үчүн 7 күнгө акча төлөшпөйт

Бишкектин тургундары ЖЭБдеги авариядан улам жылуулук үчүн 7 күнгө акча төлөшпөйт. Бул тууралуу SUPER.KG'ге "Улуттук энергетикалык холдинг" компаниясынын басма сөз кызматынан кабарлашты. Чечим Бишкек жылуулук электр борборунун сунушу менен кабыл алынды.

"Буга чейин шаар тургундары жылуулук үчүн январь айынын эсебинен 5 күнгө акча төлөбөй турган болгон. Ага дагы эки күн кошулуп жатат. Тактап айтканда, 1-2-февраль күндөр үчүн да төлөшпөйт. Себеби жылуулук жогоруда айтылган күндөрү шаардын айрым райондоруна толук жеткен эмес", - деп билдиришти "Улуттук энергетикалык холдинг" компаниясынан.

Белгилей кетсек, 26-январда кечки саат 6 чамасында Бишкектеги Жылуулук электр борборунун модернизацияланбаган бөлүгүндөгү от казандарда маселе жаралып, суунун температурасы 84 градустан 62 градуска чейин төмөндөгөн. Буга байланыштуу шаардагы үйлөргө берилген жылуулук төмөндөгөн.

Мындан улам 2 күн аралыгында Бишкекте электр энергиясын пайдалануу 8-10 пайызга жогорулаган. Электр жабдыктарына күч келгендиктен Бишкектеги кичи райондордо жайгашкан айрым көп кабаттуу үйлөр жарыксыз калган. Бишкек ЖЭБден 120 миң 947 үй жылуулук менен камсыздалат.

Башкы прокуратура ЖЭБдеги авария боюнча "шалаакылык" беренеси боюнча кылмыш ишин козгоп, ЖЭБдин башчысы Нурлан Өмүркул уулу кызматынан кеткен.