"ЭЛДИК КАБАРга" жооп: Милиция Тогуз-Тородогу митингде 1000 эмес, мындан эки эсе аз киши катышканын билдирет

Бүгүн, 7-февралда саат 11:00дө Жалал-Абад облусуна караштуу Тогуз-Торо районунун А.Сыдыков атындагы маданият үйүнүн алдында 400дөн ашуун жергиликтүү тургун чогулду. Бул тууралуу облустук милициянын басма сөз кызматы билдирди.

Маалыматка ылайык, митингчилер Тогуз-Торо районунун Каргалык айыл аймагына караштуу “Макмалалтынкен” комбинатынын жанындагы башкы подрядчик “Мега Курулуш” ЖЧКсы тарабынан жаңы курулуп жаткан “ДжиЭл Макмал Девелопинг” алтынды кайрадан иштетүүчү комбинатынын курулушуна каршы чыгышты.

Митингде жергиликтүү эл комбинат ишке кирсе жергиликтүү тургундардын ден соолугуна жана табиятка зыян алып келерин айтып, курулуп жаткан комбинаттын ачылышына жана курулушуна каршы талап коюшту. Алар менен компаниянын адистери жана Тогуз-Торо районунун акими жолугушуп, жергиликтүү тургундарга жооп берди.

Аким “учурда курулуп жаткан комбинаттын курулуш иштери токтоп турат, сиздер койгон маселе боюнча жогорку бийлик өкүлдөрүнө жиберебиз андан соң жыйынтыгын сиздерге кабарлайм” деп айткандан кийин, чогулган тургундардын арасынан 50гө жакыны курулуп жаткан ишкананын курулушу токтоп турганын жеринен көрүү үчүн таанышып чыгышты. Чогулгандар саат 13:30да тарап кетишти. Митинг учурунда мыйзам бузуулар болгон жок жана Тогуз-Торо районунун аймагында коомдук саясий абал туруктуу.

Учурда “ДжиЭл Макмал Девелопинг” компаниясынын курулуш иштери токтоп турат.

Айта кетсек, бүгүн, 7-февралда окурман Жалал-Абад облусунун Тогуз-Торо районунда алтын ылгоочу комбинаттын курулушуна каршы митинг өтүп жатканын маалымдаган. Ал митингге чыккандардын жалпы саны болжол менен 1000-1500 адамды түзөрүн билдирген.