Күрөш боюнча Кыргыз курама командасы Азия чемпиондугуна даярданууда

Күрөш боюнча Кыргыз курама командасынын балбандары Азия чемпиондугуна даярдануу максатында окуу-машыгуу жыйындарын өткөрүүдө. Бул тууралуу SUPER.KG порталына Жаштар иштери, дене тарбия жана спорт мамлекеттик агенттигинен билдирди.

Маалыматка ылайык, грек-рим, эркин жана кыз-келиндер арасындагы күрөш боюнча Кыргыз курама командалары Азия чемпиондугуна даярдануу максатында окуу-машыгуу жыйындарын өткөрүүдө.

Грек-рим күрөшү боюнча Кыргыз курама командасы машыгуусун 30-январдан 10-февралга чейин Казакстандын Тараз шаарында өткөрөт. Окуу-машыгуу жыйындарына ага машыктыруучу Азат Эркимбаев 8 спортчуну чакырган. Алардын ичинде Калы Сулайманов, Роман Царев, Самат Шырдаков, Үзүр Жусупбеков жана башкалар.

Эркин күрөш боюнча Кыргыз курама командасы окуу-машыгуу жыйындарын 12-24-февраль аралыгында Казакстандын Тараз шаарында өткөрөт. Башкы машыктыруучу Русланбек Мажинов машыгууга 10 спортчуну чакырган. Алардын ичинде Улукбек Жолдошбеков, Эламан Догдурбек уулу, Айбек Усупов жана башкалар.

Кыз-келиндер арасындагы Кыргыз курама командасы окуу-машыгуу жыйындарын 4-27-февраль аралыгында Чолпон-Ата шаарында өткөрүүдө. Башкы машыктыруучу Нурбек Изабеков машыгууга 14 спортчу чакырган. Алардын ичинде Айсулуу Тыныбекова, Айпери Медет кызы, Мээрим Жуманазарова, Саяна Байызова жана башкалар.