Таңды кофе менен тосуңуз: Жылдыздардын элеси түшүрүлгөн өзгөчө кофелер

Көптөгөн адамдар таңды кофе менен тосо турганы талашсыз. Бирок кадимки эмес, өзгөчө, тактап айтканда, сүйүктүү жылдызынын элеси түшүрүлгөн кофени ар бир эле адам жасай албайт. Ал эми Майкл Бритч аттуу жаран үчүн бул көйгөй деле жаратпайт. Анын чет элдик маалымат булактарына берген маектерине таянсак, буга чейин ал кафелердин биринде кофе жасап иштечү. Кийин кардарларынын санын көбөйтүүнү каалап, өзгөчө нерсе ойлоп табууну көздөйт. Жыйынтыгы ушундай. Учурда ал атайын майрамдар же кечелер үчүн буюртмаларды алып, элдин көңүлүн буруу максатында ар бир кардардын кофесине алардын талабына ылайык сүрөттөрдү тартып берүү менен алектенет. Ошондой эле кооз жана өзгөчө кофелерди жасап, социалдык тармактагы баракчасы аркылуу коомчулукка жарыялап турат. Азыркы тапта ага катталгандардын саны 83 миңден ашуун адамды түзөт.