Элчи Кылычбек Султан: "Тышкы иштер министрлиги бузукулардан тазаланышы керек"

"Кыргыз Республикасынын Тышкы иштер министрлигинде ким дезинформация кылып жатат?" деп суроо салат элчи Кылычбек Султан. Эске салсак, буга чейин Кыргыз мамлекетинин Корея Республикасындагы атайын жана толук ыйгарымдуу элчиси ТИМдин мыйзамсыз буйругуна нааразы болуп жатканын билдирген.

Кылычбек Султандын социалдык тармактагы баракчасына жазып чыкканына караганда, анын нааразычылык билдирип жазганы Кореянын Инчон аэропортунда эки офицерди тосуп алуу боюнча ТИМдин мыйзамсыз тапшырмасына тиешелүү болгон.

"Тышкы иштер министрлигинин "дезинформаторлору" сөз Кышкы Олимпиада оюндарына кеткен спортчулар тууралуу болуп жатат деп айтышкан. Бирок аларды жеке өзүм жана диаспоранын активисттери менен чогуу сый көрсөтүп тосуп алганбыз. ТИМ өз кезегинде элчиликке спортчулардын багыты тууралуу эч кандай тапшырма да, маалымат да берген эмес. Мен өзүм спортчулардын байланыштарын таап, качан келерин билип, Кореяда биздин Баатырларды тосуп алууну демилгеледим. Бул демилгени Кореядагы биздин диаспоранын активисттери жыргап-куунап колдошуп, кайтарымсыз эле жардам беришти. Тышкы иштер министрлиги бул иш-чарада кыймылдап да койгон жок.

Ушундан улам менин Малайзиядагы элчилик кызматынан кеткеним эске түштү. Ошондо да ушул эле "дезинформатор" элчиликтин жабылып жаткандыгы жана менин отставкам ошого байланыштуу экендиги тууралуу маалымат тараткан. Элчилик иштеп жатат... Арадан 2 жыл өттү!

Урматтуу, Сапар Жумакадырович, урматтуу Эрлан Бекешович, сиздер бул "дезинформаторлорго" карата, ошондой эле ТИМде мыйзамсыз тапшырма бергендерге чара көрөсүздөр деп ниет кылам", - деп жазган элчи.