ЖМК Неймардын Инстаграмдагы жарыясынын баасын жазууда. Бир жарнактын акысы Бишкектеги эң мыкты 2 пентхаустан кымбат

Франциянын Le Figaro гезитинин "Banklife" компаниясы жүргүзгөн изилдөөсүнө таянып жазган маалыматына караганда, футболчу Неймар Инстаграмдагы бир жарыясы үчүн 459 миң евро алат. Элестүү айтканда, сиз жеке баракчаңызга бир жарнамалык билдирүү жазып, Бишкектеги эң кымбат 2 пентхаустун акчасынан да көп каражаттуу болуп каласыз.

“ПСЖ” клубунун чабуулчусу Неймар жакында эле "Replay" брендинин кийимин жарнамалаганы үчүн ири суммадагы каражатты алганы жазылууда чет элдик маалымат булактарында. 26 жаштагы футболчунун Инстаграмдагы баракчасына катталгандар 88 миллионду түзсө, Фейсбуктагы досторунун саны 60 миллионго жетет.

Неймардын "ПСЖ" клубундагы айлыгы айына 3 миллион еврону түзөт.

Неймар Франциянын биринчилиги Лига-1де 18 гол киргизип, 12 жолу голдук топ ашырып берген. Учурда “ПСЖ” клубу Франциянын чемпиондугунда 24 оюн өткөрүп, 62 упай менен сап башында келе жатат.

"ПСЖ" 15-февраль күнү Чемпиондор Лигасынын 1/8 финалынын алкагында “Реал Мадрид” менен беттешет.