Жактоочу абакта ачкачылык кармап жаткан оппозициячылдардын абалы оор десе, Жаза аткаруу кызматы абалдары жакшы дейт

Абакта ачкачылык кармап жаткан оппозициялык саясатчылар Эрнест Карыбеков, Бектур Асанов жана Кубанычбек Кадыровдун абалдары оор. Бул тууралуу бүгүн, 9-февралда SUPER.KG порталына Кубанычбек Кадыровдун жактоочусу Марс Кыдыкбаев билдирди.

"Алардын ачкачылык жарыялашканына 10 күндөй болуп калды, мынча убакыт ачкачылык кармаган адамдардын абалдары, албетте, оор болот да. Кечээ, 8-февралда абакка барып ал-абалдары менен таанышып келдим. Бектур Асановго жолуга алган жокмун, бирок анын абалы өтө оор экенин айтышты. Алардын ден соолугун дарыгерлер көзөмөлдөп, дары-дармектерди берип жатышыптыр. 3 саясатчы 17-февралга чейин Абдил Сегизбаев кызматтан кетпесе, дарыгерлер берип жаткан дары-дармектерден да баш тартабыз деп жатышат", - дейт жактоочу.

Ал эми Мамлекеттик жаза аткаруу кызматынын басма сөз кызматынан ачкачылык кармап жаткан саясатчылардын ал-абалдары жакшы экенин, аларды дарыгерлер көзөмөлдөп жатканын кабарлашты.

Буга чейин 30-январда жогоруда аты аталган жарандар ачкачылык жарыялашкан. Мындан улам алар УКМКнын тергөө абагынан №47-колонияга которулган.

Алар УКМКнын жетекчиси Абдил Сегизбаевдин кызмат ордунан кетип, мыйзамсыз аракеттери үчүн кылмыш иши козголсун деген талаптарды коюшкан.

Айта кетсек, 2016-жылы март айында оппозиция өкүлдөрү Эрнест Карыбеков, Бектур Асанов жана Кубанычбек Кадыров "бийликти басып алууну пландашкан" деген негизде кармалышкан.