Мэр Албек Ибраимов: "Отставкага кетүүмө негиз жок"

Бишкек шаарынын мэри Албек Ибраимов отставкага кетүүсүнө негиз жоктугун айтты. Бул тууралуу бүгүн, 9-февралда мэр журналисттерге билдирди.

Анын айтымында, ЖЭБ жана "Бишкек жылуулук тармагы" ачык акционердик коому мэриянын карамагына кирбейт. "Биз өзгөчө кырдаалдар учурунда элге жардам берүү үчүн иштейбиз. Менин отставкага кетүүмө эч кандай негиз жок", - деди Ибраимов.

Эске салсак, 26-январда кечки саат 6 чамасында Бишкектеги Жылуулук электр борборунун модернизацияланбаган бөлүгүндөгү от казандарда маселе жаралып, суунун температурасы 84 градустан 62 градуска чейин төмөндөгөн. Буга байланыштуу шаардагы үйлөргө берилген жылуулук төмөндөгөн. Орун алган мүчүлүштүктөрдөн улам Бишкектин тургундары 7 күнгө (январь айынан 5 күнгө, ал эми февраль айында 2 күнгө) акча төлөшпөгөнүн "Улуттук энергетикалык холдинг" компаниясынын басма сөз кызматынан кабарлашкан. Ошондой эле Башкы прокуратура ЖЭБдеги авария боюнча "шалаакылык" беренеси боюнча кылмыш ишин козгоп, ЖЭБдин башчысы Нурлан Өмүркул уулу кызматынан кеткен. Бишкек ЖЭБден 120 миң 947 үй жылуулук менен камсыздалат.