Бишкек шаарынын мэри коомдук транспорт менен жүргөндөн уялбай турганын айтты

"Мен коомдук транспорт менен жүргөндөн уялбайм", - деп бүгүн, 9-февралда Бишкек шаарынын мэри Албек Ибраимов журналисттерге билдирди.

Анын айтымында, ал ишемби-жекшемби күндөрү коомдук транспорт менен жүрө турганын айтты. "Мен атайын эс алуу күндөрү коомдук транспортторго түшөм. Кандай иштеп жатканын көрөм. Мен элге жакын адаммын. Эл менен журналисттерсиз, сүрөтчүлөрсүз аралашам. Бир жолу коомдук транспортко отуруп, канча пенсионер маршруттук таксиге түшүп жатканын санагам", - дейт ал.

Эске салсак, 1-февралда Жогорку Кеңештин жыйынында депутат Камчыбек Жолдошбаев жөө, коомдук унаа менен жүргөн кесиптештери үчүн уялып, баш кийимин ылдый басып унаа менен Ак Үйгө кирип жатканын айткан. Мындан улам эл өкүлү журналисттерди залдан чыгарып, кызматтык унаа, жардамчы боюнча маселени кайрадан карап чыгууну сунуштаган.

Жогорку Кеңештин басма сөз кызматынын жетекчиси Ибраим Нуракун уулу кайсы депутаттар коомдук транспорт менен жүрө турганын жарыялаган. Алар: Карамат Орозова, Евгения Строкова, Аида Касымалиева жана Альфия Самигулина.