"Рио-де-Жанейро-2016" Олимпиадасында коло байгеден кол жууган Изат Артыков Азия оюндарына катышат

Оор атлетчи Изат Артыков быйыл Индонезияда өтчү Азия оюндарына катышат. Бул тууралуу SUPER.KG'ге спортчу өзү билдирди.

Анын айтымында, Азия оюндары быйыл 18-августтан 2-сентябрга чейин өтсө, эл аралык олимпиадалык комитетинин аны ири мелдештерге катышуудан ажыраткан 2 жылдык мөөнөтү 9-августта аягына чыкмакчы.

"Азия оюндарына катышам. Эл аралык олимпиадалык комитетинин менин ири мелдештерге катышуудан ажыраткан 2 жылдык мөөнөтү оюн башталганга чейин аягына чыгат. Азыр өз алдынча машыгып жатам", - деди спортчу.

Белгилей кетсек, Изат Артыков Бразилияда өткөн "Рио-де-Жанейро-2016" жайкы Олимпиадасында оор атлетика боюнча 69 килограммга чейинки салмакта күч сынап коло медаль жеңип алган. Бирок 8 күн өткөн соң ал допинг колдонгон деп айыпталып, Олимпиада оюндарынан четтетилген. Эл аралык олимпиадалык комитет Изат Артыковдун канынан стрихнин затын таап алган.