Алып баруучу Нурзат Токтосунова күйөөсү менен Египетте, Асел Турдалиева Кытайда эс алууда

Кыштын кыраан чилдесинде сууктан качып, ысык өлкөгө барып эс алуу белгилүүлөр арасында адаттагы көрүнүшкө айланды. Дегенибиз, алып баруучу Нурзат Токтосунова жана анын жолдошу, шоумен Максат Надырбеков жакын санаалаштары, окуучулары менен биргеликте Египет өлкөсүндө эс алышууда.

"Жолдошум экөөбүз саякатка чыгып келүүнү өткөн жылдын декабрь айында эле белгилегенбиз. Бирок жыл аягында иш-чаралар көп болуп убакыт таба албадык. Быйыл алпаруучуларды таптаган окуу борборубуздун 5 жылдык мааракесин Бишкектеги тойканалардын биринде белгиледик. Кечеде атайын сынак уюштуруп, жеңүүчүгө Египет өлкөсүнө барып эс алып келүүгө жолдомо тапшырган элек. Жеңүүчүнү жалгыз жибербей, команданын мүчөлөрү да чогуу келдик. Бул жакта аба ырайы ысык, таңдан кечке чейин суудан чыкпай, чабак уруп жүрөбүз", - деп сезимдери менен бөлүштү Токтосунова.

Ал эми Кыргыз Республикасынын Эмгек сиңирген артисти Асел Турдалиева саякаттоо үчүн ал өлкөдөгү аба ырайына маани бербегенин айтат. Дүйнөнүн 7 кереметинин бири болгон Кытай Эл Республикасында эс алып жүргөн ырчы айым бир ок менен эки коён атты өңдөнөт. Ал Кытайда билим алып жаткан кызына жолугуп, сагынычын таратуу менен бирге бул өлкөнүн туристтик аймактары менен да таанышып, жан дүйнө ырахатына бөлөнүүдө.