Депутат интернеттеги пикирлер үчүн жоопко тартып, 20 миң сомдон жогору айып пул салууну сунуштады

КСДП фракциясынан депутат Дастан Бекешев интернеттеги пикирлер үчүн жоопко тартып, моралдык чыгым катары айыпталуучуга 20 миң сомдон жогору айып салууну сунуштады.

Мыйзам долбоору бүгүн, 12-февралда Социалдык маселелер, билим берүү, илим, маданият жана саламаттыкты сактоо боюнча комитетинин жыйынында каралды.

"Биздин жарандык кодекс 1996-жылы кабыл алынган. Анда интернеттеги тартип каралган эмес. Эгер интернетте бирөө экинчи адамга тийишсе, маалыматты кандай төгүндөйт, ошол жагы каралат. Эгер кадыр-баркка шек келтирген маалымат бир булактан чыгып, бир нече сайтка жарыяланып кетсе, анын баары кайра ошол булактарда төгүндөлүшү шарт. Мен сөз эркиндигине тийишкен жокмун, бул жалган маалыматтарга тийиштүү. Бул коомдук талкууда аябай талкууланды. Моралдык компенсация эң аз көлөм 20 миң сом болушу керек. Мыйзам долбоорду журналисттер өздөрү түшүнбөй, туура эмес маалымат таратышкан", - деди Бекешев.

Эскерте кетсек, Дастан Бекешев интернетте социалдык түйүндөрдөгү билдирүүлөр, маалымат каражаттарындагы кадыр-баркка шек келтирген материалдар үчүн жоопкерчиликке тартуу боюнча мыйзам долбоорун январь айынын башында сунуштап коомдук талкууга койгон. Документ Жогорку Кеңештин расмий сайтында коомдук талкууга коюлганда интернет колдонуучуларынын арасында нааразычылыктарды жаратып, кызуу талкуулар, нааразычылыктар айтылган. Депутат кийинчерээк мыйзам долбоорунун текстинде ката кеткендигин, аны кайра толуктап иштеп чыгуу максатында кайтарып алганын билдирген. Андан соң 5-январда бул мыйзам долбоору Жогорку Кеңештин сайтынан да алынган болчу.