Кышкы Олимпиада оюндары: Германиялык спортчу биатлон боюнча экинчи алтын медалын жеңип алды

Бүгүн, 12-февралда Түштүк Кореянын Пйоңчаң шаарында өтүп жаткан Кышкы Олимпиада оюндарында спорттун 6 түрү боюнча медалдар ойнотулууда. Биатлон боюнча мелдеште германиялык спортчу жеңишке жетип, курама командасы үчүн 2-алтын медалды алып келди.

Кыз-келиндер арасындагы биатлон боюнча 10 чакырым аралыктагы мелдеште жалпы 60 спортчу катышып, марага 58 спортчу гана жеткен. Мелдештин жыйынтыгында германиялык Лаура Дальмайер 30 мүнөт 35.3 секунд жыйынтыгы менен 1-орунду ээледи. 2-орунда словакиялык Анастасия Кузьмина болду, ал 31 мүнөт 4.7 секунд жыйынтыгын көрсөтсө, 3-орунду ээлеген франциялык Анаис Бескон 31 мүнөт 4.9 секунд жыйынтыгын көрсөткөн.

Айта кетсек, Лаура Дальмайер 10-февралда өткөн биатлон боюнча 7,5 чакырым аралыктагы жарышта 1-орунду ээлеп, алтын медалды тагынган.

Жалпы командалык эсепте азыркы учурда: Германия курама командасы 4 алтын жана 1 коло медаль жеңип алдыда келе жатат. 2-орунда Голландия курама командасы 2 алтын, 2 күмүш жана 1 коло медаль менен жайгашкан. 3-орунда 2 алтын, 1 күмүш жана 1 коло медалдын ээси АКШ курама командасы жайгашууда.