Өлкөдө 2018-жылдан тартып үйлөрдү милдеттүү түрдө камсыздандыруу ишке ашпай жатат

Өлкөдө 2018-жылдан тартып үйлөрдү милдеттүү түрдө камсыздандыруу ишке ашпай жатат. Бул тууралуу Жогорку Кеңештин комитет жыйынында Мамлекеттик камсыздандыруу уюмунун башчысы Жумагүл Эгембердиева билдирди.

“Чүй, Бишкекте 1 пайыз эле камсыздандыруу болду. Көбүнчө өзгөчө кырдаалдар көп болгон аймактарда жарандар үйлөрүн камсыздандырып жатышат. Бир жарым жыл ичинде камсыздандыруу төгүмүн төлөгөн 150дөн ашык жаранга 17 жарым миллион сом төлөп бердик. Анын ичинен жер титирөөдөн жабыркаган 42 үйгө, чатырын шамал учуруп кеткен 68 үйгө, өрттөн жабыркаган 8 үйгө жардам бергенбиз. Кооптуу абалдагы, бузулушу керек болгон үйлөрдү камсыздандырбайбыз”, - деди Эгембердиева.

Депутат Исхак Пирматов 2018-жылдан тартып үйлөрдү, ал эми 2020-жылдан баштап автоунааларды милдеттүү камсыздандыруу боюнча кабыл алынган мыйзамды эске салды. Маалыматтарга караганда, өлкөдө үйлөрдү камсыздандыруу 600 сом, автоунааларды камсыздандыруу 2500 сомду түзөт.