Момбеков Бишкектеги кафелердин аталышын "Алыкулдун ашканасы", "Токтогулдун тойканасы" деп атоону сунуштады

Бүгүн, 14-февралда Жогорку Кеңештин жалпы жыйынында КСДП фракциясынан депутат Рыскелди Момбеков Бишкек шаарындагы кафелердин аталышын "Алыкулдун ашканасы", "Токтогулдун тойканасы", "Сайкал апанын салону", "Чачыкейдин чайканасы" деп атоону сунуштады.

"Мыйзам боюнча жарнаманын аталышы мамлекеттик тилде чоң тамга менен, расмий тилде кичине тамга менен жазылышы керек. СССР учурунда аталыштарга жакшы маани берилген экен. “Ала-Тоо” аянты, “Манас” аэропорту, "Жалал-Абад" кафеси деген аталыштар бар эле. Эгемендүүлүктөн кийин мен эне тилге кам көргөн эки эле Кыргызды көрдүм. Бири "Шайлообайдын беш бармагы", экинчиси "Жаңыбайдын самсаканасы". Азыр кафелерди карагылачы “Омар не Хаям”, “Обама”, “Амстердам” деп жазылып турат. Токтогул көчөсүндө жалгыз “Рахат” деген дүкөн бар. Москва көчөсүндө бир эле “Берекет” дегени бар", - деди Момбеков.

Монополияга каршы жөнгө салуу мамлекеттик агенттигинин өкүлү билдиргендей, өткөн жылы туура эмес аталыштар үчүн кафе, ресторан, дүкөн ээлерине 500 миң сом айып салынган.