“Ачкачылык кармап жаткандардын талаптары аткарылбаса, тамчылатма дары алуудан баш тартышат” дейт Зульфия Марат

“Абакта ачкачылык кармап жаткан саясатчылардын талаптары аткарылбаса, тамчылатма дары алуудан баш тарта тургандарын айтышты”, - деп бүгүн, 14-февралда Ак Үйдүн алдында өтүп жаткан митингде Саясий туткундарды коргоо комитетинин мүчөсү Зульфия Марат билдирди.

Зульфия Мараттын айтымында, үч саясатчы эртең, 15-февралда тамчылатма дары алуудан баш тартканга даяр. “Бектур Асанов 3 жолу эс-учун жоготту. Жолугушууга аны эки ЖАМКнын кызматкери колунан жетелеп келди. Эгерде өкмөт же президент алардын талабын аткарбаса, тамчылатма дары алуудан баш тартышат. Биздин комитет аларды мындай кадамга барбоого чакырат”, - деди Зульфия Марат.

Оппозициячыл Бектур Асанов, Кубанычбек Кадыров жана Эрнест Карыбеков 30-январдан тарта абакта кургак ачкачылык кармап жатат. Алар УКМКнын жетекчиси Абдил Сегизбаевди кызмат ордунан кетип, мыйзамсыз аракеттери үчүн кылмыш иши козголсун деген талаптарды коюшкан.