Денесинин 60 пайызы күйүп калган Аруукенин ата-энеси элден түшкөн акчаны кызына жумшабай жатканы айтылууда

Тогуз-Торо районундагы Ленин айылынын 3 жаш 7 айлык тургуну Арууке денесинин 60 пайызынан күйүк алып, дарыланып жатканын жазган элек. Күнүнө 3000 сомдун тегерегинде акча жумшалып, ата-энесинин каражаты жетишсиз болуп жаткандыктан Аруукени үйгө чыгарып кетишкен. Кызга жардам берүү үчүн элден акча чогултула баштаганын коомдук активисттер социалдык тармактар аркылуу билдиришкен. Учурда элден топтолгон акчаны ата-энеси кыздын ден соолугуна жумшабай, мамлекет бекер дарылашы керек деп жатат деген маалымат интернетте талкуу болуп жатат.

Окуянын чоо-жайын билүү үчүн Аруукенин эжеси Гүлбарчын Карабаева менен байланыштык.

"Надежда Хохлова деген айым элден акча чогултуп, Аруукеге жардам бермек экен. Биз аны билген эмеспиз. 16-январдан 5-февралга чейинки дарысына кеткен 120 000 сомду ата-энеси өздөрү төлөштү. Бир дагы дарыны, жадакалса ийнени да бекер алышкан жок. Азыр дарыгер кимден канча жардам алдыңар, канча сомго дары алдыңар жазып бергиле дейт. Ал эмнеге керек түшүнгөн жокмун. Ата-энеси элден түшкөн акчаны эч кандай өздөрүнө жумшаган жок, эч жакка да барышкан жок. Мындай сөздү Надежда Хохлова эмнеден улам айтып жатат түшүнгөн жокпуз. Энеси күндүз караса, атасы түнкүсүн кароодо. Башында терисин алмаштырууга 250 000-300 000 сомдой акча керек дешкен. Эми эч кандай акча кетпейт деп жатышат. Элден түшкөн акчадан күнүгө 3000-5000 сомго дарысын алып берип жатабыз. Дарыгерлер да ийне сайып жатышыптыр. Эмнесин биз алып, эмнесин дарыгерлер алып жатканын билбейм", - дейт Карабаева.