Бишкектин абасына аппак кездемелер аркылуу эксперимент жасалууда

"#БишкектинАбасы

#ВоздухвБишкеке

Сиз дагы ушул баннерлерди көрө алдыңызбы? Бул баннер аппак кездемеден даярдалган. Биз абанын канчалык деңгээлде таза же кир экенине эксперимент жасап жатабыз.

Кандай ойлойсуздар, бул аппак кездеме канча убакыттын ичинде кирдейт? Же көпкө чейин таза бойдон турабы? Сиздердин ой-пикирлериңиз биз үчүн маанилүү, - деген билдирүү социалдык тармакта жарыяланган.

Бул экспериментти кимдер жасап жатат? Көздөгөн максаты эмне деген собол менен "МувГрин" жаштар экологиялык кыймылынын жетекчиси Мария Колесникова менен байланыштык.

"МувГрин" жаштар экологиялык кыймылы көтөрүп чыккан демилге Бишкектеги абанын тазалыгын аныктоого багытталган. Борбордун ар бир тургунун абанын булганып жатканынан кабардар кылып, алдын алуу чараларды колдонуусуна чакырык таштадык дегим келет. Ошондон улам калктын калың катмарына абанын кир экендигин жөнөкөй мисал менен жеткирели деп, #БишкектинАбасы#ВоздухвБишкеке деген аппак кездемеден даярдалган баннер илдик. Азырынча социалдык эксперимент болгондуктан Бишкек шаары боюнча болгону 4 баннерди илүүгө мэрия уруксат берген. Мындан тышкары абанын тазалыгынын деңгээлин билүү үчүн атайын тиркеме түздүк. Ал "AbaKg" деп аталып, Android платформасынын колдонуучулары көчүрүп, маалымат алса болот. Биз экспериментибизди март айына чейин улантып, маалымат чогултабыз. Андан кийин Кыргыз Гидрометтин тегерек столунда биз өзүбүздүн жүргүзгөн мониторингибизди, мамлекеттик мекеме өзүнүн мониторингин жарыялайт. Жыйынтыгында абанын булганышынын алдын алуу маселелери каралат", - дейт.