Айпери Кубик кызы кубалык ырчы мырзалар менен чогуу керсейген жигиттерге ыр арнашат

Кыргыз эстрада ырчысы Айпери Кубик кызы Куба Республикасынын ырчы мырзалары менен тыгыз иштешип баштаган өңдөнөт. Дегенибиз, Айпери айым Марвел жана Луис деген жигиттерден турган "The Black Kings" тобу менен өзгөчө чыгарма жаратышты. Ыр саптарында кыргыз элинин "Өзүңдү эр ойлосоң, башканы шер ойло" деген макалы камтылган.

Жаңы эмгеги тууралуу Айпери Кубик кызы SUPER.KG порталына төмөнкүлөрдү айтып берди.

"Чогуу ыр жаздырууну Марвел менен Луис өздөрү сунуш кылышты. Биздин чыгармабыз өзүн өйдө баалаган жигитке кайрылуу иретинде жазылган. "Кыйынмын деп керсейбе, эртең сенден да кыйындар чыгат" деген насаат ыры десем болот. Ыр кыргыз жана испан тилинде ырдалат. Марвел испанча рэп окуса, Луис жана мен кыргызча ырдайбыз. Албетте, бири-бирибиздин тилибизди билбегендиктен ырды жаздырууда кыйынчылыктар болду".

Буга чейин Айпери Кубик кызы Хосе Агроманте менен "Дани" аттуу ырын жаздырган. Хосе экөөнүн дуэтинен кийин кубалыктарга таанылган Айпери айым "The Black Kings" тобунун жигиттери менен кыргыз, испан тилинде дагы бир чыгармасын угармандарга тартуулоонун үстүндө кызуу иштеп жатыптыр.