Жогорку Кеңештин жыйынында 10го жакын депутат отурат. Депутат жыйынды түштөн кийин улантууну сунуштады

Жогорку Кеңештин жыйынында 10го жакын депутат отурат. Жыйында “Астана шаарында 2017-жылдын 25-декабрында кол коюлган Кыргыз Республикасы менен Казакстан Республикасынын ортосундагы Кыргыз-Казак мамлекеттик чек арасын демаркациялоо жөнүндө келишимди ратификациялоо тууралуу" мыйзам долбоору каралып жатат.

"Республика-Ата Журт" фракциясынан депутат Курманкул Зулушев аталган мыйзам долбоору маанилүү болгондуктан түштөн кийин кароону сунуштады. "Бул жакта 10го жакын депутат отурат. Эл өкүлдөрү өкмөттүн жазгы талаа иштерине карата даярдыктар тууралуу маалыматты түштөн кийин карайт десе чыгып кетсе керек. Бул маселе маанилүү болгондуктан депутаттар келгенден кийин карайлы", - деди Зулушев.

Жогорку Кеңештин төрагасынын орун басары Мирлан Бакиров бул маселе үчүнчү окууда каралып жатканын эскертип, кворум бар экенин айтты.

Вице-спикер Асел Кодуранова 100 депутат каттоодон өткөнүн билдирди.

Анда Курманкул Зулушев кайрадан каттоодон өткөрүүнү сунуштады. "Өнүгүү-Прогресс" фракциясынан депутат Исхак Масалиев маселени кийинкиге жылдырууну колдоп, каттоодон өтүүнүн кажети жоктугун айтты. "Азыр каттоодон өтсөк эл карап турат, уят болуп калабыз", - деди Масалиев.

Мыйзам долбоорун кароону кийинкиге жылдыруу добушка коюлуп, колдоо тапкан жок. Жалпы 100 депутат каттоодон өтүп, 34 эл өкүлү "макул", 3 депутат "каршы" деп добуш беришти. Демилгечилер дагы бул маселени түштөн кийин кароону сунуштады. Жыйынтыгында мыйзам долбоору түштөн кийин каралмай болду.