Каракол шаарындагы мамлекеттик 15 бала бакчага видеокөзөмөл орнотулат

Каракол шаарындагы 15 бала бакчага видеокөзөмөл орнотулат. Бул тууралуу бүгүн, 15-февралда SUPER.KG порталына Каракол шаардык кеңешинин депутаты Азамат Айтбаев билдирди.

Айтбаевдин айтымында, 12-февраль күнү шаардык кеңештин депутаттары кезектеги жыйында 15 бала бакчага видеокөзөмөл орнотуу үчүн бюджеттен 850 миң сом бөлүү чечимин кабыл алышкан.

"Жакында эле Каракол шаарындагы бала бакчалардын биринде болгон окуя видеокөзөмөл орнотууну шарттап жатат. Шаардык бюджеттен 850 миң сом бекитилди , эми болжол менен бир ай ичинде сметасы түзүлөт. Андан кийин тендер уюштурулуп, аны жеңген компания 15 мамлекеттик бала бакчага видеокөзөмөл орнотуп берет", - дейт Айтбаев.

Айта кетсек, буга чейин Караколдогу №14-бала бакчада тарбияланып жаткан 2 жашар баланы аймактык ооруканага тарбиячысы оор абалда алып келген. Баланын бир күндөн кийин каза болуп калганы кабарланган. Учурда баланын өлүмү боюнча иликтөө иштери дайындалып, жыйынтыгы 1 айдан соң белгилүү болот.