Сапар Исаков ЕАЭБ өлкөлөрүнө Кыргыз мамлекетинин товарларын эмнеге өткөрбөй жатканын айтты

Премьер-министр Сапар Исаков кооператив жана логистикалык борбордун жардамы менен ЕАЭБ өлкөлөрүнө Кыргыз мамлекетинин товарларын өткөрүү маселесин чечсе боло турганын айтты. Бул тууралуу ал бүгүн, 15-февралда Жогорку Кеңештин жыйынында билдирди.

Анын айтымында, Кыргыз өлкөсүнүн айыл чарбасында жетиштүү товардын түрлөрү жок. “ЕАЭБдин кабыл алынган техникалык регламентине ылайык, биздин көп азык-түлүктөрүбүз өтпөй жатат. Бул маселени чечүү максатында “Жаңы доорго кырк кадам” программасынын негизинде кооператив түзүлөт. Кооператив товарлардын түрлөрүн көбөйтөт. Учурда "жол картанын" алкагында лабораториялар курулуп жатат”, - деди Исаков.

Айыл чарба, тамак-аш, өнөр жай жана мелиорация министри Нурбек Мурашевдин айтымында, өлкөнүн түштүк аймагында логистикалык борборлор ачылып жатат. Министр билдиргендей, логистикалык борбор ачуу максатында орусиялык компаниялар менен сүйлөшүүлөр жүрүп жатат.