Депутаттын бир сөзү менен Сапар Исаков Панфилов районунун акимин иштен алууну убадалады

Жакында кар эрип, Панфилов районунун Каптал-Арык айылын суу каптаганда райондун акими элден кабар алган жок. Бул тууралуу бүгүн, 15-февралда Жогорку Кеӊештин жыйынында депутат Бактыбек Райымкулов айтып чыкты.

"Жашоочулар аким менен байланыша албай коюшкан. Мен өзүм да чалып аким менен да, анын орун басары менен да байланыша алган жокмун. Район жетекчилиги ал жерге басып барып коюшкан жок. Ал эми өзгөчө кырдаалдар министри Кубатбек Боронов менен айыл өкмөт башчысы элге кошулуп күрөк көтөрүп жүрүштү. "Жаӊы доорго 40 кадам" деп жатасыӊар. Ушундай акимдердин өкмөткө кереги барбы?" - деди депутат.

Бул маалыматтан кийин премьер-министр Сапар Исаков: "Мен ал акимди иштен алам, сизге сөз берем", - деп билдирди.

Учурда Панфилов районунун акими Дамир Кулубаев.

Жогорку Кеӊеште өкмөттүн жазга даярдыгы талкууланууда.